baghbaan

Khamosh sa kharha
sannate bhare aankhon mein
woh takta raha
girte hue patton ko
phoolon ko chod jaate hue rangon ko
haath barhaata to rok sakta tha
urh ke jaate hue parindon ko
magar woh khamosh sa kharha
unhen takta hi raha

shahar ka shor-o-gul
gum ho chala tha
sooraj ki roshni bhi
madham si ho rahi thi
phool patton ki cheekhen
parindon ki pukaarti aahen
uske dil ko tatolti rahin
magar woh khaamosh sa kharha
unhen takta hi raha

shaayad sannata kahin
uski rooh mein utar gaya
woh baghbaan khud hi
aaj murjha saa gaya